Underground I

Lasterka joan zinen, aukerak hiru minuturo heltzen diren lurraldera. Bertan geratu zinen preso, koloretako armiarma sarean, katigatuta. Eta salbu.

Denborak erakutsi zizun, ordea, hiru minuturo aukerak joan egiten zirela.

Itxaropenaren tunelak ez direla koloretakoak ...

...lur azpian
ezkutatzean.

Geure buruaren aurkako partida

l

Labirintoak eraikitzen ditugu aldiro geure buruarentzat. Inkontzienteki.

Diana bat behar dugu guztirako, helmuga definitu bat. Baina dardo jokoa ez da beti erraza izaten. Zirkulu zuri beltzak espiral batean disolbatzen dira batzuetan. Labirintoko hormek birikak zapaltzen dizkigute, eta geure baitan galtzen gara. Eta dardoak edonora jaurtitzen ditugu orduan. Zortearen esku uzten dugu guztia, inprobisazioaren agindupean.

Zortedunenak ez dira ohartu ere egingo; larriki zaurituko dira zorigaiztokoenak. Baina ez zaigu gehiegi inportako.

Bueltan datozkigun arantzek baino ez baitigute min ematen.

Orduan bakarrik ohartzen gara okerrekoa zela hartutako bidea.

Gehiegi eskatzea...

Bidean utzitako ogi apurrak jan ez zitzaten erregutu genien txoriei...

...zomorroak baino nahiago izan zuten lotzen gintuzten zubiak irentsi.